السبت, ديسمبر ٢٤, ٢٠١١ | 
Posted by
شمس زايد |
بقلم / عزت امين
المعاكيش هم من اختاروا بارادته الحرة ان يستجيبوا لنداء الاعلامى الجليل توفيق عكاشة وان يصدقوا وهم فى كامل قواهم العقلية انه صوت الاغلبية الصامتة الرنان والمعكوش هم من رضى ان يرفع علم مصر معبراً عن رأيه ايا كان تحت منصة يتصدرمشهدها احمد سبايدر وبعدها يقول المعاكيش على من فى التحرير انهم هم السفهاء.
كما ان المعاكيش بعد ان اتريقوا على الاعلام الموجه ايام الثورة اختاروا تانى بارادتهم الحرة ان يتم عكشهم اعلاميا فينزلون الى ميدان العباسية ليستقبلوا الاعلامى الحصيف توفيق عكاشة وهو محمولا على الاعناق هاتفين ان الشهداء من اطباء ومهندسين وشيوخ ازهرين ومواطنين مخلصين هم المرتزقة والمأجورين. يدعى المعاكيش انهم صوت الاغلبية الصامتة ودة طبعا كلام اقل ما يقال عنه انه فارغ فهم ليسوا باغلبية ولا صامتين.
كما ان المعاكيش بعد ان اتريقوا على الاعلام الموجه ايام الثورة اختاروا تانى بارادتهم الحرة ان يتم عكشهم اعلاميا فينزلون الى ميدان العباسية ليستقبلوا الاعلامى الحصيف توفيق عكاشة وهو محمولا على الاعناق هاتفين ان الشهداء من اطباء ومهندسين وشيوخ ازهرين ومواطنين مخلصين هم المرتزقة والمأجورين. يدعى المعاكيش انهم صوت الاغلبية الصامتة ودة طبعا كلام اقل ما يقال عنه انه فارغ فهم ليسوا باغلبية ولا صامتين.
وحرصا على وحدة الوطن قررت ان اقارب ما بين وجهة نظر المعاكيش والاحرار فى التحرير وسوف يكون ذلك على شكل حوار ما بينى (كمحاور وليس كمتحدث عن الاحرار) وبين احد المعاكيش.
السؤال الاول...انتوا يا بتوع التحرير عايزين ايه؟
والله يا معكوش انا حاسس ان الزمن بيعيد نفسه واسألتك مابتتغيرش..فاكر لما نزلت تتصور مع الدبابة وغيرت الرنج تون بتاعك لاغنية يا بلادى ودهنت وشك علم مصر وغيرت صورة البروفايل؟ احنا عايزين نفس الطلبات هى هى
السؤال الثانى...هى مش الثورة خلصت..عايزين ايه تانى يا احرار؟
ثورة مين دى اللى خلصت يا ابو المعاكيش؟ وسيبك من كلام الاحرار فى التحرير بتوع الكرامة والعدل والكلام البايخ دة...انزل معايا الشارع كدة..سعر الانبوبة ايام مبارك كان 35 جنيه النهاردة خمسين جنيه...وفيه قطار كان محمل قمح عطل فاتنهب وسوهاج كانت هتولع من فترة علشان مافيش بنزين تمانين. لو الثورة دى فشلت قابل بقى يا برنس ثورة جياع ودى ولا فيها اعتصامات ولا ميادين ولا هتافات ولا 6 ابريل ولا تلاتة نوفمبر ولا اى منظمة موجودة فى نتيجة العام الجديد.
السؤال التالت..احنا الاغلبية الصامتة..ومالناش دعوة بالكلام دة ؟
اولا انت مش اغلبية ومش صامتة...الاغلبية بتهتم بالكلام بتاع الانابيب وبنزين تمانين والكرامة والعدل وعايزين يعيشوا فى بلد محترمة..ماتتكلمش بالنيلبة عنهم... ثانيا الاغلبية الصامتة اللى انت بتتكلم عنهم دول اغلبيتهم اختاروا بارادتهم الحرة الاسلاميين ومش حاسس انك بتتكلم عن الاخوان والسلفيين. واحب اقول كلمة للمعاكيش الاخ توفيق عكاشة بقاله فترة طويلة عمال بيهاجم الاخوان والسلفيين وبيدعو الناس ماينتخبوهمش..حسيت ان حد سمع كلامه؟ يبقى بلاش الادعاء الفارغ ان المعاكيش اغلبية وصامتة..ماحدش يتكلم بالنيابة عن الشعب..الشعب بيعرف يتكلم عن نفسه..اطلعوا انتوا منها.
هوالسؤال الاهم للمعاكيش...من انتم؟..انتوا مش الاغلبية ولا الثوار ولا البرلمان
السؤال الرابع..طب ما هم باعوكم ومانزلوش التحرير يبقوا انتوا مش اغلبية
ومين قال ان التحرير اغلبية؟
الثوار يحاربون من الاعلام وبعض خطباء المساجد والمعكوشين والمجلس. تانى حاجة السلفيين والاخوان كان فيه منهم اطباء كتير فى احداث محمد محمود والمسيرات النسائية بعد انتهاكات مجلس الوزراء كان فيها منتقبات كتير تالت حاجة حتى لو مانزلوش فهم لما بيحبوا ينزلوا بييجوا التحرير ولما مات منهم ناس كان فى التحرير ولما قفشوا على بعض من فى التحرير برضه نزلوا التحرير بغض النظر عن اى خلافات سياسية او ايدولوجية. نعود لنفس السؤال يا معاكيش..من انتم؟
السؤال الخامس..انتوا مأجورين والبرادعى عميل ووائل غنيم ماسونى ؟
ايوة والموساد حرقت المجمع العلمى علشان خرايط طابا وقطر احتلت كنتاكى ووزعت علينا الريزو..انت مابتزهقش يا معكوش او مابتجددش ليه؟ تانى حاجة هو انت حاسس ان الاحرار بينزلوا التحرير باوامر من حد سواء كان البرادعى او ممدوح حمزة او اى اسم من اللى انت شاغل دماغك بيهم دول؟
تالت حاجة لو الناس دول ليهم تأثير على الاحرار ومتحكمين فيهم زى ما انت متخيل كان المجلس العسكرى عمل معاهم اى صفقة علشان يلم الدنيا...ابوس ايدك عايزين تجديد فى الاتهامات علشان زهقنا. وبعدين معلش..سمعت عن مأجور ازهرى او طالب طب او مهندس او حتى مش متعلم اول ما يسمع ان فيه ضرب ينزل وكل ما يموت واحد جنبه يفضل مكمل وثابت على موقفه؟ المأجور هو اللى بيأجر ناس تشيله على الاعناق .المأجور عمره ما هيضحى بحياته..المأجور دة مثلا تلاقيه بيرقص على انغام اغنية هابطة. مثلا مثلا... انا شارب تلاتة ستلا وييجى كمان اتنين اى دى
السؤال السادس...طب اقنعنى ان البنت اللى اتسحلت دى كانت على حق ؟
والله العظيم انا ممكن اقوا رأيى او انقد نقد ساخر او احكى حدوتة لكن اقنع رجل انه يبقى رجل دة فوق قدراتى فاعذرنى...اصل دى مافيهاش خلاف سياسى او وجهة نظر..الصورة والفيديو بيوضح ان فيه عساكر بيتلموا على بنت ويعروها ويسحلوها ويضربوها على دماغها..ايه اللى انت محتاجنى اقنعك بيه؟ صعب اقنع انسان انه يبقى بنى آدم
السؤال السابع...بس فيه ناس كتير مش مصدقة الصورة وبتقول فوتوشوب ؟
وفيه انبياء اتقال على معجزاتهم انها سحر مبين..وفيه ناس ربنا قال انه اتختم على ابصارهم وافئدتهم..يعنى يبقى شايف الحاجة قدامه ومش عايز يشوفها او يصدقها بارادته الحرة..اذا كان نبى الله نوح عليه السلام كان عندما يتحدث الى قومه ليقنعهم برسالته كانوا يسدون اذانهم ولما ابتدا يشاور لهم غمضوا عينيهم ..عايزنى انا العبد الفقير لله اقنعك ان هنك عرض الفتيات واغتيال الشيوخ الازهرين والشباب دى اعمال اجرامية؟ استحالة طبعاً..رحم الله امرأً عرف قدر نفسه
السؤال الثامن..بس انتوا حرقتوا المجمع العلمى وكتاب وصف مصر ؟
بذمتكم يا معاكيش انتوا كنتوا عارفين ايه هو المجمع العلمى اصلا؟..طب امتى اخر مرة حد منكم راح متحف؟ طب انتوا عارفين المطافى على بعد قد ايه من المجمع؟ طب انتوا عارفين ان مجلس الشورى اللى انت ماهتمتوش انه اتحرق مع ان فيه النسخة الاصلية من معاهدة 1936 اللى انتوا مش عارفين اصلا هى بين مين ومين ساعة ما اتحرق جابو طيارات تتطفيه؟ فين الطيارات..يبقى اللى مش مقدر مش الثوار دة لو حرقوه..اللى مقدر قيمة المجمع العلمى هو اللى منع المطافى اللى بعد عشرة متر انها تيجى واللى حس ان الموضوع مش مستاهل طيارة اطفاء..دة مجرد مكان قديم فيه شوية كتب..اما الثوار فهم من انقذوا الكتب ودلوقتى بيساعدوا فى الترميم.
وبعدين دى نسخة من الكتاب مش الكتاب نفسه..ماتقهرش نفسك
السؤال التاسع..وبعيدن اعتصام مجلس الوزراء كان مانع وزارة الجنزورى انها تؤدى عملها ؟
ما يدخل من الباب التانى يا أخى.. ولا هم كانوا معتصمين على مكتب الجنزورى؟..اذا كان بيتى انا فيه بابين مجلس الوزراء مالوش باب تانى؟ وياسيدى ماتخافش اهو الجنزورى شغال زى الفل وبيشحت علينا من الدول العربية زى مبارك ما علمه.
السؤال العاشر..انتوا ليه عايزين تسقطوا الدولة وتهزموا الجيش؟
نهزم الجيش بطوب؟ انت بتتريق علينا ولا على الجيش ولا على نفسك؟ ازاى يعنى هنسقط المجلس بيافطة؟ ولا من شدة هتافنا اسلحة الجيش هتعطل؟ يعنى انت متخيل ان اللى فى التحرير نازلين يهزموا الجيش وبعدين كل واحد يروح على شغله تانى يوم عادى واليوم اللى بعده ياخد اجازة اسمها اجازة اسقاط دولة؟
ما تقول كلام عاقل ايها المعكوش....هو انت فاكر ان الى فى التحرير عايزين يبنوا دولة فيبتدوا باسقاط مؤسسة عسكرية؟ بداية قيام اى دولة هو بناء جيش قوى..بس احنا مش عايزين قيادات فى الجيش تقول نحرق المتظاهرين فى افران هتلر ولا خبير استراتيجى فى الشئون المعنوية يتكلم عن حقهم فى اطلاق النار حسب معاهدة جنيف.
السؤال الحادى عشر..ايوة عنده حق احنا بنحترم كل المعاهدات..ايه المشكلة اننا نحترم معاهدة جنيف انتوا عايزين توقعونا فى الغلط مع سويسرا اهو انتوا كدة ؟
معاهدة جنيف يا ابو المعاكيش دى خاصة بالاحتلال العسكرى..يعنى اللواء كاطو بيقول ان الجيش المصرى احتل مصر...تانى حاجة العسكراحترم معاهدة كامب دافيد مع اسرائيل واخترق معاهدة جنيف مع مصر وضرب عن عمد مستشفى ميدانى بها اطباء وجرحى..يعنى حتى لو افترضنا ان الجيش احتل مصر فحسب معاهدة جنيف مش من حقه يضرب مستشفيات ولا جرحى ولا يسحل اسيرات ولا يعريهم والا تبقى جرائم حرب.
السؤال الثانى عشر...انت بتتهم الجيش المصرى انه قتل شيخ ازهرى؟
لأ..هو انا ماعانديش دليل على هذا الاتهام..بس مش حاسس انهم مهتمين يجيبوا اللى قتله ومكتفيين بان اللى بيعمل كل دة بورتو طرة والطرف التالت والفلول والقلة المندسة واللهو الخفى والأصابع الدامية..ولو مش عارفين يجبوا قاتل من على مسافة امتار منهم يبقى يفضوها سيرة ويبطلوا يقولوا التحقيقات هى اللى هتوضح الحقيقة.
اصل بعد عشر شهور من موقعة الجمل مافيش اى حاجة بانت مع ان ايام مبارك لو امن الدولة كان قبض على جمل واحد كانوا خلوا الجمل يعترف على اللى راكبه ومتصور فيديو وهو بيرشد عن مدبر العملية.
السؤال الثالث عشر..بس العسكرى اللى ضربها دة كان لابس جزمة كاوتش
والخمس عساكر اللى جنبيه كانوا لابسين ايه؟
يعنى انت سبت ست جنود لابسين ست خوذ وست بنطولات وست قمصان مموهين للجيش المصرى ومسكت فى جزمة من ست ست جزم علشان تبرر ان البنت اللى سحلوها مش الجيش دة غير انها مش لابسة تحت العباية وفى بعض الاقاويل كان هناك بلوفر...ايها المعكوش فوق من فضلك..تانى حاجة العسكرى فى الجيش عنده جزمتين واحدة خفيفة وبيادة.
وبعدين انت عايز تقول ان فيه ميليشات مش تبع الجيش المصرى نزلت التحرير بلبس الجيش المصرى وعلى بعد امتار من الجيش المصرى وفى قلب ميدان التحرير من ورا الجيش المصرى علشان يقلعوا بنت بتهتف ضد الجيش المصرى...وهذا التنظيم الخفى الرهيب اختفى بعديها من ورا الجيش المصرى وعمل كل دة علشان يحرج الجيش المصرى. دة ايه الجبروت دة..ايه الدماغ المتكلفة دى؟ يعنى انت علشان تبرأ الجيش المصرى من الانتهاكات اتهمتهم بالفشل الذريع وفيه ميليشيات مجهولة ماشية بلبس الجيش فى ميدان التحرير عادى ومافيش حد بقولهم انتوا مين...ايه الجمال دة؟
السؤال الرابع عشر..بس فيه عسكرى غطاها ؟
واتنين عروها وضربوها وتالت سحلها ورابع ضرب اللى حاول يحميها وخامس كان بيتفرج او مستنى دوره فى الحفلة وسادس بيدور على ضحية وسابع محتار يرمى الجثث فى الزبالة زى جثث محمد محمود ولا يعذبهم عند المتحف المصرى.
السؤال الخامس عشر...بس هى اكيد عملت حاجة غلط ؟
اسألك سؤال..هو انت لو راكب عربيتك مع اربعة اصحابك وبنت خبطت عربيتك..هتنزلوا انتوا الخمسة تقلعوها وتسحلوها وتضربوها على دماغها بالكوريك واللى ييجى يحوش هتضربوه وواحد منك هينط على صدره يكسر له ضلوع؟ والمصابين هتحطوهم فى مستشفى بالكلابشات؟ لو انت هتعمل كدة يبقى الجنود كمان عندهم حق
السؤال السادس عشر...برضه ماحصلش ؟
يا سيدى الفاضل اللواء عمارة قال فى الحديث الصحفى انهم سيحققون فى واقعة سحل الفتاة..هيحققوا فى واقعة لم تحدث ازاى طيب؟
السؤال السابع عشر..انا كاره الثورة وانا حر وانا مع المجلس العسكرى ؟
تمام..بس ابنى رايك الحر على كلام مزبوط مش تلبى دعوات توفيق عكاشة..وبعدين المجلس اصلا خلع مبارك بناءاً على طلب ميادين التحرير..بمعنى ان انت لو ضد الثورة هتبقى بالتبعية ضد المجلس العسكرى مش العكس..اقولها لك بطريقة تانية...ليه مبارك مش فى الحكم؟ علشان المجلس نحاه عن الحكم..ليه المجلس نحاه عن الحكم؟ علشان الثورة
السؤال الثامن عشر...طب لو انا مش مؤمن بالثورة ابقى ايه؟
تبقى بتتهم المجلس العسكرى بالانقلاب على الشرعية ونرجع مبارك وهم يحاكمون محاكمة عسكرية..فهمت؟ يعنى لو انت بتؤيد المجلس العسكرى يبقى لازم تؤيد الثورة اللى وصلتهم للحكم حتى ولو بصورة مؤقتة..وماينفعش تؤيد المجلس وتؤيد مبارك برضه
انت كدة كأنك بتأيد الملك فاروق وعبد الناصر فى نفس الوقت..مبارك حاكم شرعى للبلاد من انتخابات 2005..صح؟ مشى ليه طيب؟ يعنى المجلس اللى حما الثورة شريك اصيل فى تنحية حاكم شرعى للبلاد واستمد شرعيته من الثورة الشعبية..وصلت؟ تمام؟
السؤال التاسع عشر...بس انا مش عاجنى اللى بيحصل فى التحرير ؟
جميل اننا وصلنا للنقطة دى..يبقى مفروض تؤيد مجلس تانى هو مجلس الشعب..لأن مجلس الشعب منتخب من الاغلبية الصامتة والمتكلمة والاحرار والمعاكيش واللى ضد الثورة واللى بيحبوا مبارك واللى بيتمنوا عودة الملك فاروق..كله...وحتى لو عايز المجلس العسكرى يقعد على طول ومش عايز انتخابات ومش عاجباك الثورة..اعمل كدة من غير ما يكون اللى بيوجهك توفيق عكاشة..انا مش ضد انك تكره التحرير انا ضد ان تكون من المعاكيش
السؤال العشرون..بس التحرير خرب البلد ؟
يعنى التحرير مثلا خرب سويسرا؟ يعنى الناس لما نزلت بالملايين اكيد لسبب..ايه السبب؟ ان البلد خربانة
السؤال الحادى والعشرون...بس انا عايز استقرار ؟
وهم يعنى اللى فى التحرير غاويين يموتوا ولا يتضربوا بغاز ولا يباتوا على الارصفة؟ هو انت فاكر ان احداث محمد محمود ومجلس الوزراء كانت لكسر روتين الحياة؟ واحد زهقان ومش لاقى فيلم عدل فى روتانا سينما قال لما انزل اواجه الجيش والامن المركزى احسن..اللى فى التحرير عايزين يستقروا هم كمان..لكن على دولة عدل وعايزين الثورة تخلص النهاردة قبل بكرة..اصل انت تعبت..هم اتضربوا انت زهقت بس هم ماتوا انت قرفت بس هم اتصابوا وانت طهقت من المناظر اللى بتشوفها فى التليفزيون هم للأسف اتفقعت عيونهم ومش شايفين التليفزيون .وبيعتذروا لو عكروا دم سيادتك او ان صوت سرينة الاسعاف وهى شايلة قتيل غطت على صوت الماتش الى انت بتابعه...هنطلب منهم يموتوا فى هدوء. انت تؤمر
السؤال الثانى والعشرون..يا اخى احنا ماصدقنا البورصة تقوم..تيجوا انتوا توقعهوا وتطفشوا السياح ؟
يمتاز المعاكيش انهم كلهم يمتلكون اصول فى البورصة واسهمهم طالعة نازلة..يا حج صلى على النبى..اللى يوقع البورصة مش اللى ماتوا او اتقتلوا..اللى يوقع البورصة تصريح الجنزورى ان فيه مخطط لحرق مصر يوم 25 يناير القادم..وبعدين يقول لك بنشجع الاستثمار..يعنى الجنزورى بيقول للسياح ويلكم تو ايجيبت بس تاك كير يا شباب البلد كلها هتولع كمان شهر.
السؤال الثالث والعشرون...انتوا خليتوا منظرنا وحش قدام الاجانب ؟
عندك حق مفروض البنت لما تتعرى من العساكر تبقى لابسة بدلة غطس ويتم هتك عرضها فى مكان خفى..وعلى رأيك ما هو الثوار هم اللى قالوا يجب حرق المتظاهرين فى افران هتلر واتكلموا على معاهدة جنيف الخاصة بالاحتلال والثوار هم اللى تبولوا على انفسهم بالبس الميرى.. وهم اللى جم بالجمال قدام الناس كلها لقتل انفسهم.. عيب الثوار يا معاكيش انهم مابيتعذبوش فى اماكن متدارية وبيموتوا وهم عاملين دوشة.
السؤال الرابع والعشرون...انا عمرى ما هاكون ضد الجيش المصرى مهما اقنعتنى ؟
مافيش دولة ضد جيشها..بس لا تلوم الضحية..فيه حل بسيط..اقعد ساكت لو مش فاهم..لا تردد كلام المعاكيش..لو شايف انها فتنة التزم الصمت..لو حاسس انك مش فاهم اسمع للطرف التانى لو حاسس انك خايف اقول لك شعور طبيعى..لو فاكر ان كل من فى التحرير مع الاعتصام اقول لك لأ بدليل ان اعداد المعتصمين اقل بكتير من المتظاهرين الغاضبين من الانتهاكات والقتل. وبعيدن ربط الجيش المصرى بتوفيق عكاشة واحمد سبايدر اهانة لهذا الجيش.
والسلام ختام..كفاية تخوين لبعض..ويالا نبنيها مع بعض بكلام موزون وعاقل مش كلام معاكيش
Labels:
مقالات
الاشتراك في:
تعليقات الرسالة (Atom)
0 comments:
إرسال تعليق